一般用來窒人，指因為有錢所以成日病。
正解：
“財多身弱”係八字命學中嘅一種格局名稱；八字命盤有「四柱」，係以中國曆法嘅天干同地支組成一柱，當中嘅年柱、月柱、日柱、時柱就係問命者嘅農曆出生年、月、日、時嘅天干地支，所以共有8個字。
“身”係指命盤中代表問命者嘅日干，算命師就係以日干去互相對比其餘7個字嘅五行關係及狀況，從而判斷“身”(日干)嘅強弱；而“財”係指財星，喺命學中理解為玩樂、財富，如果係男命主嘅話，仲可以包括係佢條女/老婆。
有“財多身弱”命格嘅人，命理上為屋富人窮，因日干太弱而擔唔起財；冇好運行的話，一生賺錢辛苦，難聚財，錢經手但落唔到袋；為人心頭高但惰性大，嗜好多，才藝多，有女人緣。
俗語、諺語、俚語、成語講得多，用得多，總會放啲喺褲袋以備不時之需，但大家知唔知，其實當中嘅詞彙好多來自風水玄學？